✏️Y STORY: Зорилго, шийдвэр жижигтэй хүн том толгойтой болчихдог юм шиг...Хэн бүхэн төдийлөн мэддэггүй хадан цохион дунд орших буйдхан сум бол миний төрж өссөн Мандах сум. Сум маань хад асгаар хүрээлэгдсэн говь нутгийн байдаг л жижигхэн сум. Тэнд би хэлд орж, хөлд орж, хөдөөгийн амар амгаланд хүн болон өссөн. Есдүгээр ангидаа анх удаа сумаасаа гарч Дорноговь аймгийн Сайншанд хотод шилжиж ирсэн юм. Шинэ ангийнхаа хаалгаар хөл даван орсон цагаасаа л “Номгүй лам хурлаас, ноолуургүй ямаа хүйтнээс” гэгчийн адил өөрийгөө мэдэрч эхэллээ. Англи хэлний “А” үсэг ч мэдэхгүй надад ангийн хүүхдүүд маань хов жив, сонин хачнаа ярих болгондоо заавал англи үг хавчуулж харьцдаг нь “Манай ангийнхан ч гадаад хэл мэддэг сүрхий хүүхдүүд юм аа” гэх бодол төрүүлж, англи хэл сурах хүслийг минь бадраадаг байж билээ. Хичээлээ л сайн хийхгүй бол айлын хүүхдүүдийн ард нь хоцроод үлдчих юм шиг санагдаад чадлынхаа хэрээр л хичээж, ялангуяа англи хэл сурахын тулд өдөр, шөнө, өглөө үдэшгүй л хичээллэж суудаг байлаа.Оройгүй их эрдэмд шамдан суралцах үүргийн хажуугаар шинэ сургууль, шинэ анги, шинэ гэр гээд бүхий л шинэ зүйлсэд дасахад хүндхэн байв. Яалт ч үгүй найз гэх хүний орон зай дутагдаж эхлэхэд азаар ч гэх үү ангийн хүү маань манай хөрш болж таараад, хосууд шиг л үргэлж хэлхэлдэн явах боллоо. Мэдээж зөвхөн сайн сайхан зүйлсийг хийгээд яваад байхгүй, шөнө орой гарч атаман ах нартай уулзах үе ч олон. Тэд нартай танилцаж, янз бүрийн бүлэг зодоон дээр хошуу дүрж сониучирхан очно. Одоо бодоход зодоонтой кинон дээр гардаг шиг их л догь амьтад өөрсдийгөө мэдрээд явж байсан юм шиг. Сайнтай муутай аль алиныг нь хослуулан төгсөх ангийн босгонд ирэхэд “Teen Хуралдай”-н өргөдөл зарлагдчихсан байдаг юм. Хараад л ёстой хэнд ч хэлэхгүй өөрөө л өргөдлөө явуулъя гэж бодоод бүтэн 7 хоног бэлдсэний эцэст өргөдлөө явуулав. Мөдхөн “Teen Хуралдай байгальд ээлтэй залуусын чуулганд ТЭНЦСЭН болохыг дуулгахад таатай байна.” гэх и-мэйл ирдэг юм даа. 18 жил амьдрахдаа улсынхаа нийслэл Улаанбаатар хотод ээжтэйгээ хоёр, гуравхан удаа очиж байсан надад нийслэл хот руу ганцаархнаа бие даан, зорилго өвөртлөн очих нь туйлын баяр жаргалтай явдал байлаа.Үе тэнгийнхнийнхээ үзэл бодол, зорилго мөрөөдөл, надаас асар их ялгаатай түүхүүдийг сонсоод би ч гэсэн дотроо бодож санадаг зүйлсээ бодит болгож болох юм биш үү гэх бодол өвөртөлж эхэлсэн юм. Тэр мөчид ирээдүйн мэргэжлээ сонгох анхны алхам маань тавигдсан юм шиг ч цаашдаа яг юу хийхээ мэдэхгүй, шийдэж чадахгүй хэвээр л байлаа.Зорилго, шийдвэр жижигтэй байвал том толгойтой болчихдог юм шиг байгаа юм. Их сургуульд сурахгүй шууд л ажиллаад, олсон хэдэн төгрөгөөрөө амьдарчихна гэсэн бодолтой том толгойлсон хүн ээж ааваасаа ятгаж гуйсаар байж зөвшөөрүүлэн Дорноговийнхоо нэг ахтай танилцаж видео зураглаачаар ажиллахаар болов. Ажил хийсэн гурван сарын хугацаанд студид ажиллаж, мэргэжлийн хүмүүстэй хамтарч, өөрийн дурлан сонирхож байсан зүйлээ бодитоор биелүүлж туршлага хуримтлуулж эхэллээ. Гэвч цаг хугацаа өнгөрөх тусам том толгойлон гаргасан шийдвэртээ эргэлзэж, хамт ажиллагсадтайгаа үл ойлголцож эхлэв. Урт хугацаанд намайг сургаж, цаашдаа дэмжиж ажиллахаар тохиролцсон ахаас хүний мөсгүй зан нь илэрч, гэнэт л өөрөөр хандаад, хэлэх хэлэхгүй бүхий л муухай үгсийг харамгүй хэлж, байж суухын аргагүй байдалд орсноор эхлүүлсэн ажлаа ч дуусгалгүй зогсоосон юм. Ээж аавдаа ажлыг умалзуулаад өгнө гээд л ойлгуулчихсан байсан хүн чинь “За ингээд модоо барьж дээ” л гэж бодогдов. Гэсэн ч энэ хугацаанд сайн мэдэхгүй, танихгүй хүнд өөрийн итгэх итгэлээ хамаагүй өгч болдоггүйг хамгийн сайнаар ойлгосон.Дээшээ тэнгэр хол, доошоо газар хатуу хаашаа харж, юу хийхээ мэдэхгүй явж байхад бурхны авралаар “Ерөнхийлөгчийн илгээлт”-нд тэнцсэн гэдгээ олж мэдсэн юм. Оргүй хоосноос дээр хэмээн сэтгэж ЭЕШ-аа бэлдэж өгсөн хэрэг минь гарчээ. Магадгүй чадлынхаа хэрээр хичээсний бэлэг байх. Хэдхэн сарын өмнө том толгойлон гаргасан шийдвэр маань надад хүнийг таних тухай хамгийн чухал амьдралын сургамж хайрласан юм шиг. Улам л хичээх ёстой хариуцлага надад тулж, урьд нь нүүр тулж байсан өнөөх асуултууд болох хаана, ямар чиглэлээр суралцах, ирээдүйд аль салбарын боловсон хүчин болох вэ? гэсэн асуулт эргэлдэх болов. Энэ удаад би огт эргэлзэлгүйгээр Хуралдайд оролцон олж авсан хүсэл тэмүүллийнхээ дагуу “Хүрээлэн буй орчны инженер” мэргэжлийг сонгож Америкийн Нэгдсэн улсын "University of Minnesota, Morris" их сургуулийг зорьсон юм.Хүний нутагт очсон хойно эх орноо илүү мэдэх хэрэгтэй болдог гэдэг нь оргүй хоосон үг биш байсныг ирсэн хойноо мэдрэх болов. Бараг өдөр бүхэн л Америк сурагчдад Монгол орон ямар сайхан болохыг, Монгол соёл юугаараа онцлог болохыг сурталчилж, улсынхаа талаарх илтгэл тавьж, тэдэнд аялгуу сайхан эх хэлээрээ яруу сайхан шүлэг уншиж, бие биелгээний уран хөдөлгөөнийг заах болсон билээ. Ташрамд дурдахад би сургуульдаа цорын ганц Монгол оюутан нь.Мандах сумаас гарсан энгийн нэгэн хүү би Миннесота мужаас энэхүү түүхийг бичин сууна. Саяхан л улсынхаа нийслэл хотод Хуралдайд оролцоод, үеийн нөхдөөсөө хэлэлцээн сонсоод, хэлэлцээн дундаас өөрийгөө танин мэдээд, дотор хүнээ инженерчлээд сууж байсан сан.Их зохиолч Дашдоржийн Нацагдорж "Хээрийн галуу нисэн үл хүрэх газраас Хүний хүү эрдэм өвөртлөн ирнэ" гэсэн сэн. Гадны улсын бодлого туршлагыг хуримтлуулан эх орондоо эргэн ирж, байгальд ээлтэй бүхий л зүйлсэд ханцуй шамлан орохоор шийдсэн оюутан би бээр сургуулийнхаа тогтвортой хөгжлийн оффист хүртэл ороод амжчихсан дадлагажигчаар ажиллаж байна даа. Энд байх хугацаандаа сурч мэдсэн зүйл бүхнээ өвөртөлж очоод эх орныхоо инженер болох цаг удахгүй ээ..Түүхийн эзэн: YSC хөтөлбөрт Дорноговь аймгаас оролцогч, Teen Хуралдай чуулганд оролцогч, Youth Power GTD чуулганы зохион байгуулагч Б.Хүрэлбаатар

Хуралдай хувь хүнийг минь инженерчилсэн. Харин би хүрээлэн буй орчноо инженерчилнэ.

Learn how to grow and scale your online course business using our online course platform. EzyCourse blog is designed to teach you how to create and sell online courses.

Хуралдай хувь хүнийг минь инженерчилсэн. Харин би хүрээлэн буй орчноо инженерчилнэ.

Хуралдай хувь хүнийг минь инженерчилсэн. Харин би хүрээлэн буй орчноо инженерчилнэ.

Related Posts

Y Story: Зургаан сарын тансаглал

Y Story - Газрын зурагтай нөхөрлөсөн он жилүүд

Y Story: Миний дотнын найз

Y Story: Оролцоон дундаас өөрийгөө олдог

"СОР 28" Дэлхийн чуулганд Монгол охин