✏️Y STORY: Цагаа тулахаар хүнийг өрөөлийн хэлсэн үгс биш толгой дотор, цээжний гүнээс урган гарсан өөрийн бодлууд л ухаажуулдаг аж. Хуралдайн гурав хоног бол тэр л ухаарлын цэг...Бусдаас онцгойроод байх юм үгүй, хоцроод чирэгдээд байх юм ч үгүй дунд нь байдаг хүн бол би. “Золзаяа” гэж нэрийг минь дуудах тохиолдолтой ирц бүртгэхээс бусад үед таарахгүй. Хааяадаа дүрсгүйтлээ гэж донгодуулна. Математикийн сонгоны анги болохоор дор бүрнээ хичээлээ хийсэн даруухан хүүхдүүдтэй хамт сурдаг. Над шиг хойшоо урагшаа гүйсэн хүн бараг л ангид маань байхгүй. Хөвгүүдтэй нийлж үймүүлдэг гэсэн шалтгаанаар голын салааны хамгийн урд ангийнхаа гоц ухаантан, гавал охинтой хамт суучхаад математикийн багшийнхаа өөдөөс “Номоо шатаачихсан” гэж тохуурхдаг ийм л охин өдөр хоногийг элээж суудаг байлаа.Арваннэгдүгээр ангид ороод удаагүй байхад Teen Хуралдай зарлагдаж азаар ч юм уу, золоор ч юм уу тэнцчихэв. Хуралдайд хөл тавьснаас хойших гурван хоног харвасан сум шиг л хурдан өнгөрчихсөн. Хуралдайд оролцогч шинэхэн найзуудтайгаа өргөдлөө илгээхдээ явуулсан бичлэгний талаар ярилцахад “Би ийм зүйлийн талаар ярьж, ингэж янзлаад, ийм ч ая дэвссэн” гэж ярихыг сонсоод дотроо өөрийнхөө илгээсэн бичлэгийг санахдаа хамрын үзүүр халуу оргиж, хацар минь мэнчийтлээ улайж орхив. Сандарсандаа ч юм уу, ичсэндээ ч юм уу “Би өөрийнхийгөө устгачихсан” гэж худлаа хэлээд нойлын өрөө рүү гүйчихлээ. Зөвхөн энэ явдлаар ч зогсохгүй хацар халуу шатам үе дахиад тохиов. Оролцогч бид цувраад алхаж байтал ард алхаж байсан хоёр хүүхэд англиар түгдрэлгүй хоорондоо ярьж байхыг хальт сонсчихов. Эх хэлээрээ ч эвлэгхэн ярьж чаддаггүй надад тэнгэр ниргээд авах шиг санагдаж, үеийн хүүхдүүд айхтар юм аа гэсэн бодол аянганы хурдаар л толгой тоншоод авлаа. Цагаа тулахаар хүнийг өрөөлийн хэлсэн хэдэн үгс биш өөрийн толгой дотор, цээжний гүнээс гарч ирсэн хурц бодлууд л ухаажуулдаг юм билээ.Тэрхэн богино хугацаанд олон юм үзэж суралцсаны дараа гэртээ очоод шинэ хүн болохоор шийдэв ээ. “Одоо жинхэнэ хичээлээ уйлуулна, дуулуулна” ухааны юм бодоод номоо эхнээс нь хуулж гарлаа. Гэтэл нэг л болдоггүй. Шалгалтаа урьд орой нь хэд уншаад л гайгүй өгчихдөг байсан болохоор муу зан сурчихсан, бичих гэдэг үйл надад нэг л таардаггүй. Ингэж тэгсээр өвлийн амралттай золгов. “Teen Хуралдай”-нхаа жишиг чуулганыг аймагтаа хийх санаа төрөөд бэлтгэл ажилдаа орлоо. Ганцхан удаа л тэр гайхамшигт чуулганд өөрөө оролцож үзсэнээс биш түүнтэй дүйцэхүйц чуулган зохион байгуулна гэхээр итгэл төрж өгөхгүй л байлаа. Гэхдээ л санаанд багтаж, бодолд бууж байгаа юм чинь биежиж л таараа гээд өөрийгөө зоригжуулаад ханцуй шамлан орлоо доо. Олон хаалга тогшиж, олон хүнтэй уулзав, олон ч хүнд загнуулав. Бүтэхгүй, болохгүй гэсэн үгстэй нүүр тулах бүрийд би ганцаараа биш, хуралдайн найзууд минь хамт гэсэн бодол сэтгэлийг минь зоригжуулдаг байв. Эцэст нь Хуралдайн найзуудтайгаа хамтарч хийсэн “Youth Power GTD” Байгальд ээлтэй залуусын чуулган маань гурван аймгийн хүүхдүүдийг нэгтгэж, нэгэн дээвэр дор цуглуулж чадсан юм. Зөвхөн томчууд л хийдэг гэж боддог байсан зүйлийг хэдэн хүүхдүүд зориглоод хийчихсэн, бүр ард нь гарчихсан байсанд өөрөөрөө, найзуудаараа маш их бахархаж билээ. Бичих нь надад таарах ажил биш гэж бодож байсан би бичихээр үл барам олон арга замд суралцаж зорилгодоо хүрсэн байсан нь гайхам сонин.Ойд төөрсөн сармагчин лугаа ирээдүйд юу хийх байтугай маргааш ямар хичээлээ хийхээ ч мэдэхгүй өдрийг өнгөрүүлдэг байсан би “Teen Хуралдай”-д оролцож ирсний дараа ирээдүйн гучин жилдээ хийж бүтээх үйлсээ зураглаж эхэлсэн бөгөөд байгаль орчны чиглэлийн хүн болно гэж бахархалтайгаар хэлдэг болов. Ингэж ярихыг минь сонссон хүмүүс “Чи байгаль хамгаалагч болох юм уу?” гэж асуудаг. Би хариуд нь “Үгүй ээ. Харин ч байгаль хамгаалагч гэдэг мэргэжлийг байхгүй болгоно, хүн бүр өөр өөрийн арга барилаар байгаль хамгаалагч байж болно” гэж хариулдаг юм. Биологийн дэвтрийнхээ ард онгоц буудаж тоглоод, хичээлийн дүнгээ модны нүх ухалцаад л гаргачихдаг байсан би бээр ЭКОЛОГИЧ гэдэг мэргэжлийг эргэж буцалтгүй сонгосон түүхийг та дөнгөж сая уншлаа. Хүн бүр өөр өөрийн арга барилаар өөрийн гэсэн онцлогтой байгаль хамгаалагч байж болохыг харвасан сум мэт өнгөрсөн гурван хоног, тэрхүү гурван хоногийг үлгэрлэж бусдадаа мэдрүүлэх гэсэн оролдлого надад ойлгуулсан билээ.Түүхийн эзэн: YSC хөтөлбөрт Дорноговь аймгаас оролцогч, Teen Хуралдай чуулган, Teen Solution уралдаан, YSC реалити шоуны оролцогч, Youth Power GTD чуулганы зохион байгуулагч А.Золзаяа

 Гучин жилийн үйлийг минь тодорхойлсон гурван хоног

Гучин жилийн үйлийг минь тодорхойлсон гурав хоног

Learn how to grow and scale your online course business using our online course platform. EzyCourse blog is designed to teach you how to create and sell online courses.

Гучин жилийн үйлийг минь тодорхойлсон гурав хоног

Гучин жилийн үйлийг минь тодорхойлсон гурав хоног

Related Posts

Y Story: Зургаан сарын тансаглал

Y Story - Газрын зурагтай нөхөрлөсөн он жилүүд

Y Story: Миний дотнын найз

Y Story: Оролцоон дундаас өөрийгөө олдог

"СОР 28" Дэлхийн чуулганд Монгол охин